Fengye College Center
خانه / تورک هفته سی / گله جک بیزیمدیر رحیم بئیگ!
گله جک بیزیمدیر رحیم بئیگ!

گله جک بیزیمدیر رحیم بئیگ!

یازار: فریدن لی حسین مسلمی، مونترال

ایناندیقلارین شئیلر، بیرگون دیلیندن گئچیب او بیریسی گون، گؤزلرین قاباقیندا یاشاناجاقلار. لاپ ایلک لحظه لرده، بیری نین ایناندیقلاریندان خبردار اولماق، امکان سیزدیر. زمان گئچر و انسان اؤزونو گؤسترر و بو گؤستریشلردندیرکی بیرینی قضاوته قالخابیلریک. بللیدیرکی قضاوتین ده بیر تملی و کؤکو اولمالی؛ یوخسا آد قویدوغوموز بو قضاوتدن ده، بیر نتیجه چیخماز.

ایندی بو کؤچوک باشلانقیج ایله، قصه میزی باشلیاق! من اؤزومو حقلی گؤرورم کی رحیم شهریاری جنابلاری نین مونترال کونکوردیا اونیورسیته سی نین اوسکار پیترسون سالونوندا وئردیگی کنسرتین باره سینده، آچیلیشیندان قورتاریشینادک سؤزلر یازام نه بیر لحظه اوندان قاباقینا و نه بیر لحظه ده اوندان سونراسینا. قازاندیغیم بو حق، ایلک اؤنجه اؤده دیگیم او بلیط پولوندان گلیر! من شهریاری جنابلاری نین هارالاردا نه ائتمه سیندن هئچ بیر زاد دئمه رم (البته من اؤزومو دئیرم کی شهریاری جنابلاریندان بیر زاد ائشیتمه میش بیر زاد دا بیلمیرم) و دئمه گینه ده حقیم یوخ. من اونون وئردیگی سرویسه مشتری اولوب ایندی ده اونون بو سرویسینی قضاوته اوتورموشام.

اوخوجولاریمیز هامیسی بیلیرلرکی مونترال-دا چوخو گلیب کنسرت وئرر. هر کیم اؤز بگندیگینی آختاریب اونا مشتری اولار. طبیعی کی، شهریاری جنابلاری نین آنادیلیمین آناتوپراغی اولان آذربایجان آدینا مونترالا آددیم آتمیشلارینا گؤره، بو آددیم منیم گؤزومون اوستونه قویمالی ایدی. دوستلار بیلیرلر کی من آذربایجانلی دگیلم. آمما آذربایجانین قاراداغینا و قاراباغینا، چالدرانینا و موغانینا، آرازینا و تبریزینه، بیله سووارینا و ساووق بولاغینا، اردبیلینه اورموسونا تا زنگانینا و ساوه سینه دک عاشیقم. بو عشق بوشو بوشونا سینه میزه گیرمه میش کی بوشو بوشونا دا چیخسین. آتالاریمیزین باغیشلادیغی جانلاری و قارداشلاریمیزین تؤکولدوگو قیزیل قانلاری و آنالار و باجیلاریمیزین اوخودوغو قملی قملی اوخشامالاری آذربایجانین ذره ذره توپراقلاریندا ایزلری قالمیش و منه و منیم کیمی ایراندا یاشایان غیر آذربایجانلی تورکلره، صلا وئریب اؤزونه چاغیرمیش هر زامان و نه گؤزل کی غربتده منه یئتیشمیش بو سس!  او دا آذربایجانین تورکو ماهنیلاری و ترانه لری ایله. دئه یین گؤروم سیز منیم یئریمده اولسایدینیز نئیلردینیز؟

گله جک بیزیمدیر رحیم بئیگ!
بیر باغ کوچه سی شرقی آذربایجاندا

ها! بیز ده ائله ائیله دیک! آذربایجانین هاواسینا قاریشدیق و «قاراداغلی یا سؤز دئمک اولماز» ماهنیسی بیزی او زامانلارا آپاردی کی تورکلره ده سؤز دئمک اولمازدی! آمما حییف کی زاماندا ائیله دیگیمیز بو خیالی سفر، شهریاری جنابلاری طرفیندن قیسیلدی و قیریلدی! کیم بیزی بو گونه سالدی کی آذربایجانین توپراغیندان جان، آد و سان آلان صنعتکاریمیز، هئچ بیر دلیل آختارمادان، قول قانادینی سیندیرسین کی تورکجه دانیشماسین! نه بیر دفعه، نه ایکی دفعه، کی دفعه لرجه و بو دلیله گؤره کی اوچ دؤرد فارسجا دانیشان دوستلاریمیز یوزلرجه تورکون آراسیندا بوغولماسینلار! بو هاوالیق، بیزی آذربایجانین تاریخینه ائتدیگیمیز خیالی سفردن کی هئچ، مونترال-دان دا چیخاردیب بیر سیرا موشکوللره سبب اولدو. بیز ائله بیر ماهنی نین هاواسینا گیریب گیرمه دن، ماهنی بیتینجه بیتمه یینجه شهریاری جنابلاری: یه چیزی بگم این اریک راشانه ها (یانی روسدور)! دالدا و یاندا اوتوران تماشاچیلاری عکس العمله وادار ائتدی: بابا تورکو دانیش لامصب!

قارداشیم شهریاری جنابلاری! او سن دیه ن فارس دوستلاریمیز، بو ایفالارین تورکجه اولدوغونو بیله رک و سئوه رک بورا گلمیشدیلر! سندن ده هئچ ایستمه دیلر کی دیلین فارسجایا چئویره سن و دموکراتیک قوراللاری دا سندن داها چوخ یاخجی دوشونوردولر!

بیز هابئله ماهنیلارین قیریم قیریم پرده لرینه باخاراق، دوشه قالخا، برنامه نین آنتراکتینا قدر، چالیشدیق کی ذوق آلیب کئفیمیزی چیقارداق. آنتراکتدا بئله دوشوندوق کی بو بیزیم حؤرمتلی صنعتچیمیز رحیم بئیگ بلکی مشتریلریندن سسلنه ن اعتراضلاری ائشیتمه میش، دئدیک بیر کاغیذ یازیب الینه یئتیرک کی کاغیذ دا تاپانمادیق! بیر نئچه آداما تاپشیردیق کی باشارسالار اگر شهریاری جنابلارینی اویاندیرسینلار کی اؤز آنادیلینده دانیشسین تا بو کنسرت آغیر سنگین باشا چاتسین! گؤردوک کی هامیسی دا بیزیم تکین ائله بئله دوشونور! من، بیر عزیز دوست ایله برابر بو قرارا گلدیک کی گئدیب پرده آرخاسیندا رحیم بئیگ ایله گؤروشک کی قاپیچی دا حاقلی اولاراق اذن وئرمه دی! ائله سانکی بیزدن اؤنجه گئدنلر وارمیش! بیز ده اونا حؤرمت قویوب قاییدیب گلیب اومیدوارلیق ایله یئریمیزده اوتوردوق. بیر دن گؤردوک کی برنامه نین مجریسی یوخ اولان، اصلینده بیزی داها چوخ شاشیرتماق اوچون برنامه نین اورتاسیندان چیخیش ائتمک ایسته میش! لذا گلیب یان دوراراق بوینونو میکروفونا اوزادیب هؤیله سک بیر حالده، فارسجا اعلان ائتدی کی ساوالان رقص گروپو هؤنرینی سیز عزیز تاماشاچیلارا سونماق ایسته ییر!

بیز ده هامیمیز او حؤرمتلی هؤیل مجری ایله یولداشلیق و امکداشلیق ائیلیه رک، ساوالانین ایکی کیشیلیک رقص گروپونو آلقیشلایا آلقیشلایا صحنه یه آلدیق! سونرا شهریاری جنابلاری و باشاریلی موسیقیچیلری صحنه یه گلدیلر. بیز بئله ظن ائتمیشدیک کی بو ایکینجی یاریدا، شهریاری جنابلاری بیزی آذربایجانین ساوالانینا و سهندینه گؤتوره جک و اوردان دا مغانا گئده جگیک کی:

«گئدین دئیین خان چوبانا!

گلمه سین بو یاز موغانا!

گلسه باتار ناحاق قانا!

آپاردی سئللر سارانی

بیر آلاگؤزلو بالانی»

و بیزی داها بو هاوالاردان چیخارتمایاجاق! آمما زهی کی اومدوغوموز خیال نه قدر واهی و نه قدر بوش خیال ایدی! شهریاری جنابلاری قیلیجی اوستدن باغلامیش بو سفر تورکجه فارسجا دانیشماغین تعارفینی ده قیراغا قویاراق، صحنه نی بئله بیر جومله لر ایله باشلادیلارکی: یه نفر اومد پشت صحنه به ما گفت آقا چند نفری دارن میرنا!  گفتم چرا؟! گفت که چون شما دارید فارسی حرف میزنید! خوب برن! خوب برن! چه ربطی داره! بابا ما ایرانی هستیم! … من به خاطر چند درصد فارس زبان ایرانی دارم فارسی حرف می زنم!…

دئدیک یوخ! یوخ! شهریاری جنابلاری، بو کیمی دوشونجه لر ایله، آذربایجان هاوالیقلارینی بیزه اسدیره بیلمز و ایرانین تورک میلّتی نین چالارنماینده سی اولاماز! بو آقا، بیزیم دویدوغوموز دویغولاری آنلامیر! چونکو آناسی دانیشدیغی دیلده، متینلیک، قووت، جسارت، قورخمازلیق و سارسیلمازلیغین زیروه سینه حالا یئتیشمه میش! بلکی بیر گون یئتیشدی! ایندیلیک باشقا زادلار آختاریر! بیلمیرکی میلّتینه دال چئویرن، یولونو قازانماز گئدر و اوتوزار هر گون!

خانیما دئدیم خانیم قالماق ایسترسن قالاق ایسته مزسن سالونو ترک ائدنلر وار گئدک بیز ده! دئدی بیزیم آغیر یولوموز گئتمکده دیر! شهریاری جنابلاری بیزه اوخومور اوخوماق دا ایسته میر!  نه اوچون قالاق! بیز ده بیر سؤز دئمه دن، شهریاری جنابلارینی او یوزده نئچه کیشیلیک سئودیگی، بیز گؤرمیه ن یولداشلارینا و آلقیشلایان جمعیته بیراخیب اوتوبوس دوراغینادک گئتدیک! سونرا اؤز اؤزوموزه دئدیک بو نه اولدو! شهریاری جنابلاری اوره گی سؤزونو دئدی، بیزدن ده جوابینی آلسین گئتسین! او ایدی کی اتوبوس دوراغیندان سالونون قاپیسینا دؤنوب ایچری یه گیرمه دن، قاپیچی لارین یانیندا اوتوردوق! گؤردوک کی سالونو ترک ائتمک تجربه سینده لاپ دا یالنیز دگیلمیشیک و چوخونلوغا باخمایاراق، بیزیم کیمی، یاری اغیارلا گؤزو گؤتورمیه ن آداملار چوخ وار! کی همیشه ده وار اولسونلار!

بکچی لر کیمی کشیکده دوردوق. میلّت سازینی ائشیدیب حاشیه یه باخمادان و بلکی ده باخماق ایستمه دن (دئمک کی بونو هر کیم باشارماز!)، اوشاغی الیندن توتوب ائوینه دؤندو! خانیما دئدیم نه اولوردو بیز ده اوستاد شهریارین دئدیگی کیمی بو میلّت تکین قمسیز قمسیز یاشیاق! خانیم فورا جواب وئردی: اوشاقلیغا دؤن! سنین ده یاشامین قمسیز اولاجاق! انتظار چوخ چکمه دی! گؤردوک کی رحیم بئیگ ساللانا ساللانا اؤزل چیخیش قاپیسیندان بیزه ساری گلیر! بیر گولومسه ده دوداقلاریندا قوروموش!

چالیشدیق رحیم بئیگه آنلاتاق کی بیزیم بگندیگیمیز صنعتکار، آنا دیلینه و او دیلده دانیشانلارا حؤرمتی داها چوخ اولمالیدیر و «بیچاق اؤز قینینی کسمز» و رحیمین ده جوابی بیزه بو اولدو: «یئر برک اولاندا، اؤکوز اؤکوز گؤزوندن گؤرور!»

ایندی بلکی گئچمیشیمیزدن ایشیقلار ساچدی گله جگیمیزه، بیرلیکده، گلجه ک بیزیمدیر رحیم بئیگ! یئترکی دیالوقلار آچیق قالسین آرامیزدا!

اوستاد شهریار-دان قیسسالمیش بیر شاهید

تورکون دیلی تک سئوگیلی ایستکلی دیل اولماز

اؤزگه دیله قاتسان بو اصیل دیل اصیل اولماز

اؤز شعرینی فارسا-عربه قاتماسا شاعیر

شعری اوخویانلار، ائشیدنلر کسیل اولماز

فارس شاعری چوخ سؤزلرینی بیزدن آپارمیش

«صابیر» کیمی بیر سفره لی شاعیر پخیل اولماز

تورکون مثلی، فولکلوری دونیادا تک دیر

خان یورقانی، کند ایچره مثل دیر، میتیل اولماز

آذر قوشونو، قیصر رومی اسیر ائتمیش

کسری سؤزودور بیر بئله تاریخ ناغیل اولماز

پیشمیش کیمی شعرین ده گرک داد دوزو اولسون

کند اهلی بیلرلر کی دوشابسیز خشیل اولماز

سؤزلرده جواهیر کیمی دیر، اصلی بدلدن

تشخیص وئره ن اولسا بو قدر زیر- زیبیل اولماز

نویسنده: هفته

مطلب پیشنهادی:

رحیم شهریاری

کنسرت رحیم شهریاری با حاشیه‌هایی برگزار شد

رحیم شهریاری خواننده نام‌آشنای آذربایجانی جمعه گذشته در سالن کنسرت اسکار پیترسون در مونترال برنامه …

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *