20ژانویه2017

22 دی 1395 نوشته شده توسط 

یئنی میلادی ایلینده دونیایا باریش آرزیسی هارایا قدر یئترلی اولا بیلر؟!

آیدین شافاق 193
P34-N-1
سایتلار دا گزرکن، «اوجاق دات آی آر»* سایتیندا، 2016 میلادی ایلینین قوتلاما پیغامینا یئتیشدیم. بیر ایل بوندان اؤنجه بو سایت دا یازیر: «2015جی میلادی ایلی داها سونا چاتدی و یئنی ایل شاختا و سویوق ایله گلیب یولدان یئتیشدی. گئچن ایلی چوخلو اینسانلار دونیانین چوخلو یئرلرینده اولان ترور و ساواشلارلا برابر یاشادیلار و آغیر بیر گونلر سوردولر. اومیدیمیز وار 2016 جی ایل، باریش اوچون داواملی، اوشاقلار اوچون ائو-ائشیکلی، آتا-آنالی، یئنی اومیدلر، یئنی خیال‌لار و اینسانلیق اوغروندا یئنی بیر باشلانیش ایلی اولسون!»

P34-N-2
بو آرزی چوخ اوره ییمه اوتوردو، بئله بیر اومودون و بئله بیر دونیانین دوغرولما آرزیسیندان چوخ سئویندیم. «باریش ایچین داواملی، اوشاقلار ایچین ائو-ائشیکلی آتا-آنالی .... و اینسانلیق اوغروندا یئنی بیر باشلانیش»، نه گؤزل! بو دوروم گرچک اولورسا دونیامیز جنت اولا بیلر دئییه چوخ آرزیلاندیم؛ آمما یوخ! نه یازیق کی بیر کیچیک باخیش 2016 ایلینده گئچن گونلره بو آرزی نین گرچک اولمادیغینی اورتایا قویور. گئچن 2016 ایلینده قونشوموز تورکیه ده یاشایان دیلداش باجی قارداشلاریمیزین دورومونو خاطیرلایاراق، اوره ییم چوخ سیخیلدی. بیزیم قونشو اؤلکه لر، سوریه ده و تورکیه ده یاشانان ساواشلار و ترورلارین نتیجه سینده چوخلو اینسانلار حیاتینی غاییب ائتدیلر. چوخ اینسانلارین ائولری داغیلدی، یووالاری ییخیلدی، سورگون دوشدولر اوندان داها اؤنملی سی دیلنجی اولاراق شرفلرین و حیثییتلرین الدن وئردیلر. سون سفریمده پاریس ده مترولاردا و خیابانلاردا آتا-آنا اوشاقلاریلا بیرلیکده عائیله وی دیلنن سوریه لی عائیله لره شاهید اولدوم. نه بیر ایکی بلکه آددیم به آددیم! بونلاری گؤرمک و اونلارین عائیله وی دیلنمک لرینه شاهید اولماق سفریمین چوخ آجی و قارانلیق خاطیره لریندن اولدو! اونلارین کیچیک اوشاقلاریلا برابر دووار قیراغیندا پتو آلتیندا سیغیناجاق هر یولدان گئچندن سؤال ائتمه لری و ال آچمالاری هله ده گؤزومون اؤنونده دیر. اینسانلاری تا بو حدده قدر آلچاقلاما، چاره سیز قویما و اونلارین شرفلری ایله، اعتبارلاریلا و جانلاریلا اویناماق هارایا قدر و هانسی ایله قدر؟! بو اینسانی فلاکتلر داها هارایا قدر سوره جکدیر؟! بؤیوک قودرتلرین شیطانی فیکیرلری، بو قودرتلری تشکیل ائدن قوه لرین و اینسانلارین سینیرسیز حئرص لاری، طاماح لاری، رحمت سیز و شفقت سیز اورک لری، یاتمیش وجدانلاری و سونوندا جاناوارا دؤنموش روحلاری نه زامان میللتلری راحات قویاجاقدیر؟! جاناوار دئدیم؛ آمما یوخ! حتی ییرتیجی جاناوارلار دا شیطان صفت انسانلارایله موقایسه ده، آلداتان، نئچه اوزلو، ماسکالی حیله کار اولمادیقلاریندان، دونیانین ان صاف، ان دورو و ان دوزگون یارادیلیشلاریندان و وارلیقلاریندان دیرلار.

P34-N-3
سئویردیم، 2017 یئنی میلادی ایلینده، آیدین شافاق صایفاسینی، دونیانین بوتون میللتلرینه باریشیق، جان ساغلیغی، دینجه لیش و راحاتلیق آرزیسیلا باشلامیش اولایدیم؛ آمما نه یازیق کی هر ایل گئچن ایلدن داها آرتیق اینسانلار گوناهسیز یئره، جانلارین الدن وئریرلر. دونیانین پیس گوجلری حتی ایل دؤنومو گئجه سی ایستانبول دا بؤیوک بیر اینسانی فلاکت و قملی فاجعه

P34-N-4

 

یاراتدیلار! بؤیوک اوستادیمیز شهریار دئمیشلی:
آخیر زماندی بیر قولاق آس عرشی تیتره دیـر
ملت لرین هــارای، مددی، الامـــان سسی
انسان خـزانی دیر تؤکولور جـان خزل کیمی
سازتک خزل یاغاندا سیزیلدار خزان سسی

P34-N-5
بو سبب دن، بلکه ده شیطانا ساتقین روحلو اینسانلارین و اونلارین دالیسیندا گیزلنن ماسکالی چیرکین گوجلرین یاشادیغی زامانا قدر و اوندان داها اؤنملی سی دونیانین قولاغی ساغیر، گؤزو گؤرمز اولدوغونا گؤره، بشره قورتولوش اولا بیلمیه جک! سونوندا بئله بیر زاواللی دونیادا و بئله بیر چاره سیزلیکده یئنه ده اوستاد شهریارین اینجه و حساس روحوندان و درین دوشونجه سیندن قالخان شعرله بیرسس اولوب، یئنی ایل ده اوستاد ایسته دییی نجاتی اوره ییمیزین تکیندن بشره آرزیلاییریق!
«هر دعا شیطان ائدیر، دونیا اونا آمین دئییر
قوی دعا قالسین، بیزه سن وئر بو آمین دن نجات»

انس و جن
اوستاد شهریار:
بار الاها سن بیزه وئر بو شیاطین دن نجات
اینسانین نسلین کسیب، وئر اینسه بو جین دن نجات
بیزدن آنجاق بیر قالیرسا، شیطان آرتیب مین دوغوب
هانسی رؤیا ده گؤروم من، بیر تاپا مین دن نجات
بئش مین ایلدیر بو سلاطینه گرفتار اولموشوق
دین ده گلدی، تاپمادیق بیز بو سلاطین دن نجات
بیر یالانچی دین ده اولموش شیطانین بیر مهره سی
دوغرو بیر دین وئر بیزه وئر بو یالان دین دن نجات
هر دعا شیطان ائدیر، دنیا اونا آمین دئییر
قوی دعا قالسین، بیزه سن وئر بو آمین دن نجات
ارسینی تندیرلرین گودوشلاریلا اویناییر
کیمدی بو گودوشلارا وئرسین بو ارسیندن نجات
یا کرم قیل، کینلی شیطانین الیندن آل بیزی
یا کی شیطانین اؤزون وئر بیرجه بو کین دن نجات
اؤلدورور خلقی، سورا ختمین توتوب یاسین اوخور
بارالاها خلقه وئر بو حوققا یاسین دن نجات
دینه قارشی بابکی – افشینی بیر دکان ائدیب
بارالاها دینه، بو بابکدن، افشین دن نجات
ویس و رامین تک بیزی رسوای خاص و عام ائدیب
ویس ده اولساق، بیزه یارب بو رامین دن نجات
شوروی دن ده نجات اومدوق کی بیر خئیر اولمادی
اولماسا چای صاندیقیندا قوی گله چین دن نجات
من تویوق تک، اؤز نینیمده دوستاغام ایللر بویو
بیر خوروز یوللا تاپام من بلکی بو نین دن نجات
«شهریارین» دا عزیزیم بیر توتارلی آهی وار
دوشمنی اهریمن اولسون، تاپماز آهین دن نجات
http://www.ocaq.ir*
بیر خبر اورمودان:
اورمو بیلیم یوردونون اؤیرنجیلیک دنیز درگیسی باغلاتدیریلدی
«اورمودنیزی،آرزوبلاگ دات کام»ین یازدیغینا گؤره اؤیرنجیلیک«دنیز» درگیسی‌نین یاییمی اورمو بیلیم‌یوردونون درگی‌لره نظارت ائدن کومیته‌سی‌نین قراری ایله یاساقلاندی. بوکومیته قورولوسو، 18/12/2016 تاریخینده کئچیردیگی اوتورومدا دنیز درگیسی‌نی باغلامایا قرار وئردی.
دنیز درگیسی نه گؤندریلن رسمی مکتوبدا، بو درگی اؤنجه‌کی قرار‌لار اوستونده دورماماق و قومی آیریملارینی کؤروکله‌مک، میللی بیرلیگی زده‌له‌مک و اون دوردونجو سایی سیندا لاتین الیفباسیندان ایستیفاده ائتمک کیمی اتهاملاری ایله متهم اولموشدور.
درگینین سوروملو مودورو، «یاسر رنجبری»، درگی‌نین باغلاتیلماسی سببی نی، درگی لره ناظر کمیته اعضاسینین باغیمسیز اولمادیقلارینی و اونلارین بیلیم‌یوردونون ائشیکیندن ربط سیز ارگانلاردان تاثیر گؤتورمک لرینی بیلدی و درگی نین باغلانماسیندا گئچن عدالتسیزلیکدن خبر وئردی.
آیریجا، بو درگی‌نین سون سایی سیندا، ایران آذربایجان تورک‌لری‌نین فارس سویچولوغونا قارشی، 18 آبان آیاقلانماسی‌نین بیرینجی ایل‌دؤنومونه گؤره مطلب یازیلمیشدی بو مسئله بیلیم‌یوردون درگی‌لره باخان کمیته سینی، داها دا راحاتسیز ائتمیشدیر.
آرتیرمالیییق، دنیز درگیسی قاباقجادان دا 1394 ایلینین قیشیندان باشلایاراق 6 آی بویونجا یاییم یاساغینا محکوم اولونموشدو.
اورمو بیلیم‌یوردونون اؤیرنجیلیک تورکجه- فارسجا دنیز درگیسی‌نین یاییملانما مجوزی 23/08/1389(14/11/2010) ایلینده آلینمیشدیر. دنیز درگیسی بونجا ایل، فرهنگ، جامعه، ادبیات، بیلیم و ورزش زمینه لرینده اون‌دؤرود (14) سایی یاییملایاراق آذربایجان اؤیرنجی توپلومونون تانینمیش درگی‌لریندن بیری اولموشدور.

یئدینجی حیدربابا خاطئره لری
ساوالان گئچیریر:
یکشنبه گونو 15 ژانویه 2017 یئدینجی شعر جلسه سی ساعات 6 دا گرین مرکزینده گئچیریله جکدیر. بیرلیکده آنایوردوموزون شاعیرلرین تانیییب، آنادیلیمیزده سؤیله نن شعرلریمیزی اوخویوب، آراشدیرماق ایچین، ساوالان قوروپو مونترال دا یاشایان تورک لری و اؤز فرهنگینه ده یر وئریب اونا باغلی اولانلاری بو اوتوروما دعوت ائدیر. تورکجه ده شعر سؤیله مک ذوقونا صاحیب اولان عزیزلری بوجلسه ده گؤرمک و اونلارین قوشدوغو شعرلری ائشیتمک هامیا چوخ جاذیبه لی اولاجاق. اؤز شعرلریزی گتیریب اوخوماق ایله بو جلسه نی داهادا آرتیق ده یرلندیریرسینیز.
گیریش=5 دلار
Adresse : 1090 Avenue Greene, Westmount, QC.
H3Z 1Z9
Metro, Atwater