20ژانویه2017

08 دی 1395 نوشته شده توسط 

حیدربابا جلسه لری گوجلو ادبیاتیمیزی و قوجامان فولکلوروموزو تانیتدیرمایا چالیشیر

آیدین شافاق 192
ساوالان گئچیریر:
یکشنبه گونو 15 ژانویه 2017 یئدینجی شعر جلسه لری ساعات 6 دا گرین مرکزینده گئچیریله جکدیر. ساوالان قوروپو مونترال دا یاشایان تورک لری و اؤز فرهنگینه ده یر وئریب اونا باغلی اولانلاری دعوت ائدیر تا بیرلیکده آنایوردوموزون شاعیرلرین تانییب، آنادیلیمیزده سؤیله نن شعرلریمیزی اوخویوب و آراشدیراق.
گیریش=5 دلار
Adresse : 1090 Avenue Greene, Westmount, QC.
H3Z 1Z9
Metro, Atwater
Tel: 514 768 5969
P34-N-1

                       شهریارین حشکناب دا کی آتا ائویندن قالان خرابه لر
عکسلر: رضا بابازاده
یکشنبه گونو دسامبرین 11 ده مونترال دا یاشایان ساوالان فرهنگ گوروهونون طرفیندن «حیدربابا خاطیره لری» جلسه سی، گرین مرکزینده گئچیریلدی. بو جلسه ده حیدربابا شعرلرین اوخویوب آراشدیرمادان علاوه، رضا بابا زاده اؤزونون دفعه لرجه سفریندن خشکنابا دانیشدی و اوردا توتدوغو عکس لری بیر بیر توضیح وئررکن سؤیله دی: « بو سفرلر منیم ایچین چوخ ده یرلی و جاذیبه لی ایدی. حیدربابا داغی و شهریارین آتا بابا کندی، بستان آوا شهرینین قره چیمن بخشینده اولان خشکناب کندی دیر. حیدربابایا گئتمه یه ایکی یول وار، بیرینجی یول قزلجا کندیندن گئچرکن، امامیه و داش آتان کند لرین گؤروب سونرا خشکناب کندینه یتیشیر. بیر زامان یوزلرجه اوشاق اوندا اویناقلاییب و های کوی سسی دام باجانی توتان خشکناب کندینده ایندی یالنیز ایکی عائیله یاشاییر و چوخ اوزاق دوشموش بیر کند دیر. میلیونلارجا تورک اینسانلارین خیالیندا یاشایان و اونلارین روحوندا اثر قویان خشکنابین اوچ کیلومترلیگینده کی حیدر بابا داغی صبریله دایانیب قوجامان فرهنگیمیزدن خبر وئرن خاطیره لریله افقلره گوز تیکیبدیر. حیدر بابا داغینی یاخیندان گؤرنلر اوندا یاشایان آرامش و انرژی نی حیس ائدرلر. حیدر بابا داغینین او بیری تایداکی اتگینده کیچیک شهریارین گئچیردییی گونلر یئری، قئش قورشاق کندی یئرلشیب دیر. داشلی بولاغ و قره کؤلون دره سی و بوتون حیدربابا شعرینده گلن مکانلار هامیسی اوردا گؤز قاباغیندا دیر. قیش قورشاق دان اویانا شنگل آوا کندی دیر. شنگیل آوانین باغلاری و باخچا لاری هله ده کی هله دی اوردا یاشایانلارین آراسیندا شهرتلی و آدلیم بیر یئرلر دیرلر. حیدربابا ماحالی طبیعتینین گؤزلیگینه گؤره یاز دا و یای دا طبیعت سئونلری اؤز طرفینه چکیر. بو سفر منیم ایچین بؤیوک بیر تجروبه و عین زاماندا اونوتولمایان بیر خاطیره اولوب، دورو آینا کیمی حیدر بابا شعرلرینده سؤیله نن بوتون هر بیر شئی ای گؤزومون اؤنونه گتیردی و حیدربابانی منه یاشاتدی.»

P34-N-2

P34-N-3

                                                  حیدربابا داغی
سونوندا رضا بابازاده بیر سورو مطرح ائدیب و اونا بئله جواب وئردی: «آمما ندن بو ماحالین تانیماغی اؤنملی دیر؟ بونون جوابی بو اولا بیلر کی حیدربابا- شهریارین یارارتدیغی تای سیز منظومه- بو یئرلردن و بو کوچه لردن و بو داغ اتگینده یاشایان صفالی اینسانلاردان دانیشیر. دونیا اوزونده میلیونلارجا اینسانین اوره گینی سوینج و غمله دولدوران، اونلاری آغلادیب و گولدورن حیدر بابایه سلام، اؤز شعرلرینده اینسانلاری خیال آتینا میندیریب، بیر به بیر بو یئرلی گزدیریر و اوردا یاشایان گؤزل و معنی لی فولکلوروموزدان روایت ائدیر. آنجاق شهریاری و حیدربابانی تانیماق اوچون بو کند لری گزیب و بو کوچه لر ایله تانیش اولماق چوخ فایدالی اولا بیلر. هر حالدا بو ساوالان قوران حیدربابا شعر جلسه لری یوردوموزون قوجامان و گوجلو ادبیاتی نی و اونونلا یاشایان فولکلور، هونر و ایفتیخارلی تاریخینی تانیتدیرمایا چالیشیر.»
حیدر بابا جلسه لری قوربتده کولتوروموزو یاشادیر
یازار: ودود جمشیدی

P34-N-4jpg

من اورمولویام، ائولی و بیر اوشاق باباسیام. الکتریک موهندیسی ام. 12 ایلدن چوخ مسلکیم برق شبکه لرینی تاسارلاما (design)، اولاشدیرما (transmission)، دَنَمه و سیناما اولوب. ایکی ایل دن چوخدور مونترال دا یاشییرام و مک گیل دا اؤیرنجییم.
من ساوالان مدنیت قروپونون «حیدر بابا خاطیره لری» آدلی جلسه لریله اوچ آی دیر تانیش اولموشام. بو توپلانتی لار آیدا بیر کز قورولور و من اوچ کز دیر بو توپلانتییا قاتیلیرام. من بو جلسه لری چوخ فایدالی و دَیَرلی تاپمیشام و آردینین گلمه سینی آرزی ائدیرم. منجه بو توپلانتی لار نه تکجه منه بلکه بوتون مونترال دا یاشایان تورکلر ایچین بیر تاپیلماز فرصت دیر. اونلار بو جلسه لرده شهریارین یاشایشینی و حیدر بابایه سلام شعرلرینی اینجه لمک و دریندن آنلاماق فرصتینی تاپابیلرلر. آنجاق یئتَر بو توپلانتیلاردا بولونسونلار.
بو گونکو دنیادا اینسانلار اؤز کولتورلرینی یاشاتماق و تانیتماق ایچون سوسیال درنک لره، توپلانتی لارا، قورولتایلارا و ... ایحتیاجلاری وار. منجه «حیدر بابا خاطیره لری» ویا بونا بنزر جلسه لرین بیر باشقا اؤنمی ده بوردا گیزلی دیر، و بیزلر تکجه بو توپلانتیلارلا ویا بوجور کولتورسَل اولای لاری چوخالتماقلا، اؤز کولتوروموزون قوربتده یاشاتماغینی بئجره بیللیک و اوشاقلاریمیزی بورادا اؤز کولتورموزله بسله ییب ویا تانیش ائده بیلریک ویا ایَر داها ایرَلی گئتسم، باشقا میللتلری ده اؤز کولتورموزله تانیش ائده بیللیک. بونون ایچین بیزلر گرک بو توپلانتیلارا قاتیلماقلا ال اله وئریب و بو چالیشمالاری گوجلندیرک تا کولتورل یاشامیمیزی بورادا دوام ائتدیره بیلک.

اوستاد شهریار، فرح پهلوی نین هدیه سینی رد ائتمیشدی
«من و آتامین خاطئره لری» کیتابیندان بیر خاطئره
یازار: دکتور جواد هیئت
«....ایلک سفریمدن سونرا، ایسلام دئوریمینه قدر باکی یا سفر ائده بیلمه دیم. شوروی نین تانینمیش، جسور، صراحتلی و فارسجانی یاخشی بیلن ایران شوناسی، «روستم علی یف» لا مسکووا دا تانیش اولموشدوم. بو ایران شوناس شاهنامه اوستونده ایشله ییب، مسکووا دا پروفسور «غفور اوف»ون کومکی ایله اونون نشرینه گؤره شاه-ین و ایران دوولتینین دیقتینی و توجهونو قازانمیشدی. بیزیم گؤروشوموزدن 2 آی سونرا، دولتین قوناغی اولاراق تهرانا گلدی.
روستم علی یف تهرانا یئتیشدییی زامان، منه، سهنده و ساییر دوسلارا تلفن ائتدی. من اونون گؤروشونه گئدیب اونو ائویمه دعوت ائله دیم و رحمتلیق دکتور نطقی و قارداشلاریم ایله تانیشتیردیم. بیر گون علی یف دانیشارکن شهریار دان سوروشدو. دئدیم: «اوستاد شهریار تبریز ده یاشاییر، فارسجا شعر دئییر و قورآن یازیر آمما داها تورکجه شعر دئمیری.»
علی یف دئدی: «اَیَر شهریارین یئنی دن آنا دیلینده شعر سؤیله مه یین و یئنی حیدربابالار یاراتماغینی ایستیرسیز، اونو تهرانا گتیرین دووره سین آلین و تشویق ائدین. بو ایش چوخ گرک دیر.»
روستمین نظری اوره ییمه اوتوردو، شهریارلا دانیشیب اونو عائیله سیله بیرلیکده تهراندا منیم ائویمده قالمایا دعوت ائتدیم. شهریار بو دعوتی قبول ائده رک بوتون عائیله سیله تهرانا گلیب 2 هفته سهندین ائوینده قالاندان سونرا، منیم ائویمه گلدیلر و 5 آی بیزده قالدیلار.
بو موددتده ادب و فرهنگ سئون اینسانلار ییغیشیب شهریارین دووره سینی آلدیلار. بونون نتیجه سینده بیزیم ائو ایکی دیللی شعر و ادبیات دایره سینه چوندو و یئنی دن شهریارین تورکجه ده شعر دئمه یینه سبب اولدو.
بیر گون فرح پهلوی نین دفترینین مودورو، فرح ین پیغامی نی شهریارا چاتدیرماق ایچین شهریارین گؤرمه یینه گلیب دئدی شهبانو بویوردولار: «اوستاد من سیزین ایچین تهراندا بیر ائو آلارام و اؤزوزون و عائیله نیزین هر راحاتچیلیغینی تامین ائده رم. یئتر کی تهران دا قالاسیز.» اوستاد شهریار تشکوردن سونرا جواب وئردی: «من و عائیله م دکتور هیئتین ائوینده راحاتیق و ائو آلماغا هئچ گرک یوخ. شهبانو لوطف ائدرسه منیم فارسجا شعرلریم کیمی تورکجه شعرلریمین نشرینه دستور وئرسینلر او زامان من اؤزوم اونون قازانجیندان تهراندا اویغون بیر ائو آلا بیلرم.»
آمما نه یازیق کی شهریار، فرحین بو دورومدا یئترلی گوج صاحیبی اولمامایینی بیلمیردی! چونکو قازاق فرماندهی سرهنگ تیمورون قیزی آنا ملکه 12 یاشیندا باکی دان تهرانا گلیب و گنجلیینده آتاسینین گوماشته سی رضایلا (رضا شاه ایله) ائولنمیشدی. آمما ملکه اولدوغوندا دا تورکجه ده دئدییی شعرلری نشر ائده بیلمه میشدی. اؤلوموندن اؤنجه اونلاری قیزی شمسه تاپیشیریر آمما ایندییه قدر اوشعرلرین باشینا نه گلدییی معلوم دئییل.»