23ژانویه2017

01 مهر 1395 نوشته شده توسط 

سینه سرطانی‌نین قاباغینی آلان یئمک‌لر

آیدین شافاق 180
P34-N-1
شرح عکس: دوکتور «ائرکان توپوز»Erkan Topuz سرطان اوزمانی( متخصصی)
قادین ساغلیغی: دوکتور توپوز
دؤش سرطانی دئمک اولار، هر 30 یاش‌دان یوخاری خانیم‌لارین قارشی-قارشییا قالا بیله‌جه‌یی بیر ریسک‌دیر. گونوموزده کئچمیشله توتوشدورمادا هر کئچن گون داها چوخ سینه سرطانی تشخیصی ایله اوزبه‌اوز اولوروق. بونون سببی بللی مقداردا ژئنئتیک فاکتورلار و ایستیفاده ائتدییمیز بَزَکلی ساغلیق محصول‌لار ایچینده اولان شیمیایی ماده‌لر، یئدیییمیز ارزاق‌لارداکی سرطانا یول آچان یئمکلر اولور. یئدیییمیز ایله ایستیفاده ائتدییمیز محصول‌لارین ترکیبین‌دکی‌ ماده لره دیقّت ائده‌رک سینه سرطانینین توتولما ریسکینی آزالدا بیلریک. بونا گؤره ده بو قونودا گئنیش آختاریش ائدیب هانسی یئمه‌یی یئییب-یئمه‌یه‌جه‌ییمیزی اؤیرنمک لازم‌دیر. پروفسور دوکتور«ائرکان توپوز»ون خانیم‌لارا مصلحت گؤردویو قیدا‌لارلا سیزی تانیش ائتمک ایسته‌ییریک.
لیمون و نارینگی قابیغی
لیمون و نارینگی قابیغیندا شیشی أریده بیلن و چوخالماسی‌نین قارشی‌سینی آلان ماده‌لر واردیر. بونا گؤره ده بو قابیق‌لارین آتیلماماسی، سیرکه‌لی سودا یویولا‌راق یئییلمه‌سی مصلحت گؤرولور.
نار
نار سویو، دنه‌سی و قابیغی‌نین دا سرطانین قارشی‌سینی آلما گوجو واردیر. هر مئیوه‌نی فصلینده یئمه‌یه دقت ائده‌رک ناری دا قابیغی ایله بیرلیکده یئیه بیلرسینیز.
گؤبه‌لک
P34-N-2گؤبه‌له‌یین ساغلاملیغا فایداسی هر کسه معلوم‌دور. آنجاق چالیشین اسمر( رنگی تیره) گؤبلک‌لردن ایستیفاده ائدین. آغ گؤبه‌لک‌لر سرطان عمله گتیرن ماده‌لرله آغاردیلمیش‌دیر.
قیرمیزی مئیوه‌لر
P34-N-3
موروق(تمشک/Moruq) دان، چیله‌ک(توت فرنگی) دن و بؤیورتکن‌ دن(شاه توت)دان فصلینده بوللوجا ییین. هم ده یارپاقلاریندان‌ چای دمله‌ییب ایچمکده فایدا واردیر. شیش‌لری أریتمک تأثیری اولدوقجا چوخ‌دور.
روزمارین
روزمارین دئمک اولار، بوتون خسته‌لیک‌لر اوچون چوخ فایدا‌لی بیتکی‌دیر. حتی ائوده گولدان‌دا یئتیشدیره بیله‌جه‌یینیز بیر بیتکی‌دیر. شیش‌لری أریتمکده تأثیرلی‌دیر. روزمارینله یاناشی قوزو قولاغی، زنجیر اوتو دا چوخ فایدا‌لی بیتکی‌لردیر.
P34-N-4
یئرکؤکو
یئرکؤکوده A ویتامی‌نین چوخ اولماسی، دری، بؤیرک و دؤش سرطانی‌ ایله دؤیوشمکده کؤمه‌ییمیزه چاتیر.
قیرمیزی بادیمجان
پومیدورو مؤوسومونده ایستیفاده ائتمک چوخ واجیب‌دیر. هم ده قیرمیزی بادیمجان‌دان سالچا(روب) دوزلدیب ایستیفاده ائده بیلرسینیز.
E ویتامینی
ائ ویتامینی اوچون سلنیوم باخیمین‌دان زنگین آناناس، قاتیق، بروکولی، انگینار(کنگر فرنگی)، قیرمیزی و آغ کلم و پرپتؤیون (پرپرن) چوخ یئیین.
یاشیل چای
یاشیل چای سلول بؤلونمه‌سینی یاواشلا‌دیر. چایی آچیق و قندسیز ایچمه‌یه دقت ائدین. هر گون ایکی فینجان چوبان‌یاستیغی و زنجفیل چایی ایچین.
چوبان‌یاستیغی (بابونه) بیتکی‌سی* و چیچه‌یی: یول قیراقلاریندا و بوش اراضی‌لرده اؤز-اؤزونه یئتیشن خوش قوخولو ساری-آغ بویادا چیچک‌لر آچان بیر بیتکی‌دیر. چوبان‌یاستیغی‌نین فایدا‌لاری: ایشتاهی آچیر. سینیرلری دینجَلدیر، ائله‌جه ده باش و بئل آغریسینا خصوصی ایله مثبت تأثیر گؤستریر، آغری‌لاری ساکیتلشدیریر. دیش آغریسینا دا فایدا‌لی‌دیر. بدنه راحات‌لیق وئریر. ادرار آرتیریجی سی‌دیر.
بیتکی=گیاه
کلم
دونیادا ان اوجوز و شافا‌لی بیتکی اولان کلمی هفته‌ده ان آزی بیر دفعه یئمکده فایدا واردیر. باغیرساق و قاراجییرلردکی زهرین قارشی‌سینی آلیر و شیش‌لرین چوخالماسینا مانع اولور.
                                                                    *****
دَریمیزه ایشیق توخوندوقدا ندن قاشینیریق؟
P34-N-5
بیلیم سسی، افشین شهبازی
بیر بؤجک دَرینیزه قوندوغوندا، سیزی دؤزولمز بیر دورومدا قاشیندیریر. بو مکانیکی بیر قاشینتی اولاراق تانینیر. شیمیایی قاشینتی‌لار اوزه‌رینده ایسه چوخ آز آراشدیرمالار اولوب.
بعضی‌لریمیز داواملی اولاراق قاشینتی چتین‌لییی یاشاییریق، نه قدر قاشینساق دا قورتاراجاغیمیز اولمور. نورمال دورومدا آنتی‌هیستامین درمانلاری ایله قاشینمانین قاباغینی آلماق اولار آنجاق داواملی و آغیر قاشینتی‌لار اوچون بو یارارلی دئییل. بو دوروم، بیلیم اینسانلارینی، داواملی و شیددتلی قاشینتیلاری آرادان آپارماق اوچون، چئشیدلی یول-یولاقلار آختارماق فیکرینه سالدی.
بیلیم ژورنالیندا نشر اولونان آراشدیرمادا، بیر گروه ایلک اولاراق مکانیکی قاشینتی‌نین نَدن‌لرینی آراشدیردی و ائن پی وای (NPY) آدلی بیر پروتئین کشف ائتدیلر. بو پروتئینین، قاشینتیلاردا ائتگی‌لی اولدوغونو تاپمیش اولسالار دا بئله، هله آراشدیرمالار تام یئتَرلی دئییل‌دیر.
(NPY)-ین قورویوجو اولدوغونو دوشونَن آراشدیریجی گروهو، سیچانلاردان بو پروتئینی اوزاقلاشدیردیقلاریندا، اونلارین ایشیق قاباغیندا دؤزولمز بیر شکیلده قاشیندیقلارینی گؤردولر! بورادان یولا چیخان علم اینسانلاری، مکانیکی و شیمیایی قاشینتیلارین فرق‌لی ندنلری‌نین اولدوغونا چاتدیلار.
آراشدیرمانین داوامیندا ایسه، ژنتیکی دئییشیکلیکلرله بؤیوموش سیچانلاردا ایسه(ائن پی وای پروتئینی‌نین چوخ اولدوغوندان دولایی) ایشیقدان یارانان قاشینتی‌لار داها آز گؤروندو.
بئله‌لیکله ایشیقدان تؤره‌نن قاشینتی‌لارین ندنی، بدن‌ده NPY آدلی پروتئینین آزلیغی‌دیر.
                                                                     *****
قارانقوشون گؤزوندن
مذهب داعواسی: کؤهنه قاپی، کؤهنه دابان
بعضی دَییشیکلیکلرله، آرشیودن سئچیلمیش‌دیر.
ایران و سعودی عربیستانین آراسینداکی داعوالار دونن سیراغاگونون حیکایتی دئییل. ایسلامدان قاباق عربلر همیشه گوجلو قونشولاری اولان ایراندان قورخوب اوزاق گزرمیشلر و البته هر واخت ایرانین وضعی قاریشاندا اونون سرحد بؤلگه‌لرینه حمله ائیلرمیشلر. ایران شاهلاری عرب یاریم‌آداسی (شبه جزیره‌سی‌) و اونون قومساللیق‌لارینی فتح ائتمه‌یه چوخ هوسلی گؤرونمه‌میش اولسالار دا، همیشه بین‌النهرین بؤلگه‌سینی و یا فارس کؤرفزی‌نین گونئیینده‌کی (جنوبونداکی) استراتژیک اهمیته مالیک اولان تورپاقلار اوسته عربیستان‌داکی عربلرله توققوشمالاری اولارمیش و بو منطقه‌لرین حاکیمیّتینی اؤز اللرینه کئچیرمه‌یه چوخ مئیللری وار ایمیش. اونودمامالی‌ییق کی ایسلام اوردوسو ایرانا حمله ائتدییینده ساسانی‌لرین پایتاختی و زامانیندا دونیانین ان بؤیوک شهرلریندن ساییلان تیسفون شهری بوگونکو باغداد شهری‌نین لاپ یاخینلیغیندا یئرلشمیش ایمیش. ایران ایمپاراتورلوغو بیر زامان دا اؤز سرحدلرینی یاریم‌آداداکی عربلرین حمله‌لریندن قورویوب دینج ساخلاماق هدفی ایله، ایران حؤکومتینه باغلی اولان "حیره" پادیشاهلیغی‌نین قورولماسینا کؤمک ائدیب و بو ایشله اؤزونه بوگونکو ایصطیلاحلا بیر "حائیل بؤلگه" یارادمیشدی. بعضاً ده سرحدلره ال اوزادان عرب طایفالارینی بو گونکو یمن اؤلکه‌سینه قدر قووالارمیش. بو قووالامالارین بیر دفعه‌سینده ایران شاهی ایکینجی شاپورون امری ایله, عربلره گؤز داغی اولسون دییه، یاخالانان عربلرین چی‌یینلری دلینیر. ائله اونا گؤره ده ایکینجی شاپور تاریخده "ذوالاکتاف" (چی‌یینلرین صاحیبی) آدی ایله ده تانینیر.
آنجاق ایسلامین اورتایا چیخماسی، ائله دوز ایران ایمپاراتورلوغونون سارسیلمیش دُؤرونه راست گلیر و بوتون دَنگه‌لری و قاباقکی دوزَنلری آلت‌اوست ائدیر. منطقه‌نین یئنی گوجو، یعنی یئنی موسلمان عربلر، آرتیق دین صاحیبی اولان و اونلارا چوخ زامان آشاغی گؤزله باخیب و اونلارین مدنیّت‌دن اوزاق قالمیش اولدوقلاری اوچون اونلاری تحقیر ائدیب سایمایان رقیبلرینه قارشی ساواشماغا باشلاییب و ائله باشدا ایران ایمپاراتورلوغونو دیزه چؤکدوردولر. ایش بونا محدود قالمادی و یئنی دین ایرانین کؤکلو زردوشتی دینینین یئرینی آلدی. اوندان اؤنجه‌سینه قدر فارسلارین تحقیرینه معروض قالان عربلر، دای آرتیق اؤزلرینی فارسلاردان و عمومیت‌له فتح ائتدیکلری یئرلرین اهالی‌سیندن اوستون بیلیب و یایدیقلاری ایسلامین اساس اؤیرتدیکلرینه ترس اولان بیر شکیلده اونلار ایله ایکینجی درجه‌لی وطنداش موعامله‌سی ائدیردیلر. آرتیق قوجامان بیر پادیشاهلیق اللرینه دوشموشدو. لاکین، ایرانلیلار دا الی‌قولو باغلی اوتوروب باشلارینا گلنی تاماشا ائتمه‌یه راضی اولمادیلار و یئنی دینین آداملاری یاواش‌یاواش و قدیم زردوشتیلییین عونصورلاریندان ایستیفاده ائده‌ر‌ک همین ایسلامیت‌دن و موسلمان عربلرین آرالارینداکی ایختیلاف‌لاردان بهره‌لنیب شیعه‌لییی اورتایا چیخارتماق ایله یئدیکلری ضربه‌‌دن بیر جوره قورتولماغا جان آتدیلار. سؤزون قیساسی، ایسلامیت‌دن قاباقکی داعوالار بالا بالا مذهب قیلیفیندا اؤزون گؤسترمه‌یه باشلادی.
بئله‌لیکله، شیعه و سؤنّی داعواسینین بینؤره‌سی قویولموش اولدو و عرب ایستیلاسینا قارشی چیخان ایرانلیلار خورّمیلیک و زردوشتیلیک آدینا باشلانان حرکتلرین آرتیق بیر یئره یئتیشمه‌یه‌جه‌یینی باشا دوشدوکدن سونرا، اؤز موستقیللیک حرکتلرینی شیعه‌لیک بایراغی آلتیندا یئریتدیلر. سونرالار، عوثمانلی ایمپاراتورلوغو اؤزونو سونّی خلافت واریثی، و صفویلر اؤزلرینی شیعه‌لییین واریثی اولاراق گؤرمه‌لری، یاخین شرقین بو ایکی بؤیوک دؤولتینی ایللرجه بیر بیرینین جانینا سالدی و البته‌کی بو آرادا ان بؤیوک زیانی تورک دونیاسی گؤردو و او زیانلارین اثرلری هله‌ ده دوام ائدیر.
ایندی بوگونوموزده، بیر چوخ اهمیتلی دؤوره‌یه شاهیدیک. نفت پولو، آتم پروژه‌سی و بؤیوک بیر جمعیّت گوجونه آرخالانان ایران، اؤزونون ایسلامدان اؤنجه‌کی ایقتیداری و ساسانی ایمپاراتولوغونون سرحدلرینین یئنیدن برپا ائدیلمه‌سینین خیالینی بسله‌ییر. بو آرتیق گیزلی بیر مؤوضوع دا دئییل. کئچن ایل ایران جومهور رئیسی‌نین موشاویر و یاردیمجیسی (یونسی) آچیقجا دئدی کی عراق ایرانین بیر پارچاسی دیر و اونا گؤره ده یا گرک ایرانا قُوووشسون یا دا گرک ایکی اؤلکه‌نین آراسیندا ساواش چیخسین. او همین ایدّعانی دیل‌دوداق آراسیندا ایندی موستقیل دؤولتلر اولان لاکین قدیم ایراندان ساییلان اؤلکه‌لر حاقّیندا دا دئدی.
عربیستان دا ائله نفت پولونون وئردییی جسارتله قدیم خلافتی دیریلتمه‌یه جان آتیر و منطقه‌ده گؤتوردویو هر آددیم بونو ایثباتلاییر.
مین دؤردیؤز ایلدن سونرا، عربیستان و ایرانین ساواش مئیدانلاری گئنه‌ده بین‌النهرین (عراق)، یمن و شام‌دیر (سوریه). قدیم دین و سُوی (نژاد) داعواسی‌ایدی؛ ایندی ایسه مذهب و سُوی داعواسی‌دیر. بو آرادا، ایکی اؤلکه‌نین عاغیللی‌لاری، یعنی آیدین‌فیکیرلی‌لری، بلکی بو ایکی اؤلکه‌نین یاخینلاشماسینا کؤمک ائیله‌یه بیلردیلر، لاکین نه حئییف کی عربیستان طرفینده آیدین‌فیکیرلی‌لرین سایی‌سی یوخ دئیه بیله‌جک قدر آزدیر، و ایران طرفینده ایسه آیدین‌فیکیرلی‌لر یازدیقلاری و سؤیله‌دیکلری ایله بو مذهب و عیرق داعواسینا سو یئرینه اوُدون داشی‌ییرلار. گؤرونن او کی، کؤهنه قاپی و کؤهنه دابان یئرینده‌دیر و ساواش طبیللرینه دؤوَنلرین سسی باریش یالواران سسلری بوغور و بو آرادا اولان سوریه‌ده، عراقدا و یمن‌ده‌کی طالع‌سیز خالقا اولور. ‌

گلن گؤرؤشه‌دک!
کؤچری
عزیز اوخوجولاریمیز اشیق عاباسین سوگی داستانینی بیر نئچه مودت دن سونرا ایدامه وئرجه ییز.