23آوریل2019

28 خرداد 1394 نوشته شده توسط 

نیسگیلیم صمد...

قارانقوشون گؤزوندن (21)

P32.N
کؤچری

اوشاق ایدیم، یئتدی سکگیز یاشیمدا. تئزه اینقیلاب اولموشدو. بیرگؤن بابام منه بیر کیتاب آلیب ائوه گتیرمیشدی. بؤیؤک بیر شوق ایله آناما دئییردی کی صمدین کیتابین آلمیشام اوشاغا. ائله صمیمی لحن ایله "صمد" دئییردی کی من اوشاق عالمینده "صمدی"ین عایله‌دن بیری اولدوغونو سانمیشدیم. کیتابین اؤزرینده "ماهی سیاه کوچولو" یازیردی. بیر نئچه هفته سونرا دا صمدین باشقا کیتابلارینی آلدیلار منه. "بیست‌و چهار ساعت در خواب و بیداری"، "اولدوز و کلاغها"، "پسرک لبوفروش"، "تلخون".... آمّا بو ناغیللارداکی دؤنیالار او زمانا قدر ائشیدیب و یا اوخودوغوم ناغیللاردان چوخ فرقلی‌ایدی. مخصوصاً "بیست و چهار ساعت در خواب و بیداری"‌ده کی خیاوانلاردا یاشایان او یوخسول اوشاقلارین حالی، ویترینلردکی اویونجاقلارا عاشیق اولمالاری، رؤیالاریندا اونلارلا گزیب دولانمالاری، گؤزلری اؤنؤنده زنگین اوشاقلارین گلیب اونلارین چوخ سئودیگی اویونجاقلاری آلیب آپارمالاری، خیاواندا کؤچه‌ده گؤردؤکلری تحقیر و اذیّتلر و واقعیتده‌کی حیاتلاری ایله رؤیالارینداکی دؤنیانین آراسینداکی اوچوروملار قدر درین فرق منیم روحومون اؤزرینده چوخ بؤیؤک بیر تأثیر بوراخیردی. لاکین من هله ده بو قدر عایله‌یه یاخین حیس ائتدیگیم صمددن کیتابلارین جیلد آرخالارینداکی او گؤزلؤکلؤ، آشیقلارین بؤرکؤنه بنزر بیر بؤرک باشیندا اولان آریق جاوان کیشیدن باشقا بیر شئی بیلمه‌ییردیم.
صمدین کیتابلارینداکی یازیلان قیسا بیوگرافی‌دن تبریزلی اولدوغونو آنلامیشدیم. ذاتاً ناغیللارداکی "اولدوز"، "یاشار"، لب‌لبی ساتان "تاری‌وردی" کیمی آدلاردان اونون منیم آنادیلیم تؤرکجه‌ایله تانیش اولدوغونو آنلاییب و بونا چوخ سئوینمیشدیم. اوشاق ایکن یایلاری تبریزه گئدردیم. تبریزده‌کی محله‌میز "چرنداب" محله‌سی ایله چی‌یین به چی‌یین‌ایدی. "چرنداب" آدین او قیسا بیوگرافی‌لردن خاطیرلاییردیم، "... در محلۀ چرنداب تبریز به دنیا آمد". چرندابین قوملو تورپاقلی کؤچه‌لرین دولانیب کؤهنه تخته قاپیلارین، سوواق دام دووارلارین یانیندان گئچنده، "کؤهنه‌پالتار آلان" باغیریب دولانان قوجا کیشیلری، مازی، بادام، آشیغ اوینایان آیاق‌یالین اوشاقلاری گؤرنده، اؤز اؤزؤمه دئیَردیم کی باخ صمد ده منیم کئچدیگیم بو کؤچه‌لردن کئچیب، بو سسلری او دا ائشیدیب و بو آداملاری او دا گؤرؤب. بلکی ده ایندی بو قاپیلارین بیریندن ائشیگه چیخاجاق!
ایللر کئچدی. بؤیؤمؤشدؤم آرتیق. دای آرتیق صمدین آذربایجان کندلرینده درس وئرن یاشلاریندایدیم. بو ایللرده صمدین کیم اولدوغونو، ائتدیکلرینی و باشینا گلنلری بیلمیشدیم. "آراز آراز، قان آراز..." بایاتیسینی ائشیدجک گؤزلریم یاشلا دولوب داشاردی. تهرانین اطرافینداکی آذربایجان کندلریندن کؤچؤب گلن کندلی اوشاقلارین حالینی یاخیندان گؤرؤب صمدی یؤزلر دفعه خاطیرلامیشدیم. خلوتیمده صمدله چوخ دردلشمیشدیم، آمّا اونو گؤرمه‌یه نه حئییف کی امامیه مزارلیغینا گئدیب و اؤزرینده "دوست خوب بچه‌ها ..." یازیلان قبیر داشین گؤرمک‌ایله راضی اولمالی ایدیم. "عیبی یوخ، عوضینه ایندی دؤنیادا میلیونلارجا اینسان منیم صمدیمی بالاجا قارا بالیغی ایله تانیرلار. او گؤزلؤکلؤ، بیغلی، پاپاقلی، آریق، ائل مؤعلّیمینین محبتّی میلیونلارجا اوشاغین و بؤیؤکؤن اؤره‌گینده دیر. نیسگیللی صمدیمین خوش گؤنلری گلیب چاتاجاق هله! صمدین محبتینی اوشاقلاریمیزا دا تاپیشیراجاغیق هله! صمده هر ایل یایین اوّلینده آد گؤنؤ توتاجاغیق هله! یاشا صمدیم! یاشا یوردومون کندلرینین یوخسول اوشاقلارینین درد اورتاغی. یاشا یارالی دیلیمین مرهمی. یاش نیسگیللی صمدیم! دوغوم گؤنؤن مؤبارک اولسون!
صمد بهرنگی 2 تیر 1318ده (24 ژوئن 1393ده) تبریزین چرنداب محلّه‌‌سینده، زحمتکش بیر عائله‌ده دؤنیایا گؤز آچدی. او هر ایل ائله بو تاریخده دؤنیایا گؤز آچار. اونون تَوَلّؤدؤ بؤتؤن "تاری‌وردی"لره، "اولدوز"لارا، "یاشار"لارا "بیلیت‌ساتان زیور"لرین بالالارینا، بالاجا قارابالیغی سئونلره و بؤتؤن کؤچه خیاوانداکی یوخسول اوشاقلارا مؤبارک اولسون!
بیر نئچه هفته‌دن سونرا یئنی‌دن گؤرؤشه‌نه‌دک، هامینیزی آللاها تاپیشیریرام. "سیز ساغ، من سلامت!"