24می2019

14 بهمن 1395 نوشته شده توسط 

«یوغورت»، ان اؤنملی حیات و گنجلیک اِکسیری

آیدین شافاق 196
P34-N-1
یوغورت دونیا دا ان چوخ یئییلن سوت محصوللارینین باشیندا گلیر و بؤیوک سطحده ایستیفاده اولونور. یوغورت چوخ اسکی چاغلاردان ناخوشلوقلارین تداوی سی و ساغلیق لی یاشامین اکسیری اولاراق تانینمیشدیر. خصوصیله ائوده دوزلینن یوغورتلار ساغلیق موضوعوندا داها آرتیق تأثیرلی دیر. چونکو کرخانالاردا دوزلینن یوغورت بیر سئرا مرحله لری گئچیرتمکده، بعضی ویتامینلر و مینراللاری الدن وئریر.
یوغوردو ساغلیق ایچین بو قدر اؤنملی ائدن، شوبهه سیز ایچینده اولان موهم و فرقلی یئمک ماده لری و عنصرلار دیر. خصوصیله سوموک و اسکلت ساغلیغینا یاخشی گلن ماده لره، هابئله «سی» و «بی 12 »ویتامین لرینه چوخ میقداردا صاحیب اولدوغو دور. بونون یانیندا سوموک ساغلیغینا فایدالی اولان چوخ میقدار دا پتاسیم، سدیم، کلسیم، دمیر و منگنزه شامیل اولدوغودور. آیریجا اونون ایچین ده کی وجود ساغلیغی ایچین چوخ اؤنملی و موهم اولان «امگا4 »یاغلاری دیر.
یوغوردون ان اؤنملی خصوصیتلریندن بیر داناسی سوموک لر ایچین اؤنملی اولان کلسیمو دور. کلسیم گئنیش آنلامدا، بنیه ایچین انرژی ساغلار. یوغورت آیریجا وزن آزالتاماقدا و سویوق دیمه یه بیر شفا قایناقی دیر. آز موددتده یوغوردون فایدالارینی حیس ائتمک مومکوندور. گئجه لر یاتمادان اؤنجه بیر کیچیک کاسا یوغورت یئمک آیریجا بیر خوش یوخویا گئتمک ایچین فایدالی اولور.
دری ساغلیغی
یوغورتدا تاپیلان فایدالی اسیدلر سایه سینده بیر جوخ جیلد ناخوشلوقلاریندان قورتولماق آسانلاشیر و ساغلیکلی بیر جیلده صاحیب اولماغا، اکنه، قارچ و میکربلاردان قایناقلانان ناخوشلوقلارلا ساواشا بیلمک اولور. یوغورت جیلد و توک(ساچ) ساغلیغی نا چوخ فایدالی و گئنیش طیف ده یوغورتدان اوز ماسکی، اوز دری سینین قورولوغو و یاغسیزلیغینا درمان دیر. یوغورت دری سلوللارینین یئنی لنمه سینه و مرمت اولونماسینا کومک چی اولور.
«اسید لاکتیک»لر و «روی» ماده سی یوغوردون ایچینده اولدوغونا گؤره، درینین منفذ لرین آچار، جیلدی اؤلو سلول لاردان تمیزلر و جیلده ساغلیقلی بیر پارلاقلیق باغیشلار. آیریجا دری ده مئیدانا گلن خط لرین و قئرئش(چروک) لارین آزالتماسیندا کومک اولا بیلر. طبیعی یوغورت دری نی نملندیرر(مرطوب ائلر). حساس دری لر ایچین قالین بیر لایه یوغورت سورتمک، دری یورقونلوغونو آرادان آپارار و ساغلیکلی بیر گؤرونوم قازاندیرار. بو نتیجه یه یئتیشمک ایچین، اؤزه یوغورت چکیب 10 دقیقه دن سونرا ایلیق سویونان یوماق چوخ اثرلی دیر. جیلد چوخ آرتیق قورو اولدوغوندا یوغوردا بال قاریشدیراراق ایستیفاده اولونا بیلر. یوغورت ماسکی قورو و حساس دری لری هیدراته ائدیب درینین اؤلو سلوللرین آریدیب و یئنی سلول لارین اویولماسینا کومک چی اولور. دوگو ایله قاریشمیش یوغورد ماسکی، 20 دقیقه دری نین اوستونده قالدیقدان سونرا اوزون دری سینده تاپیلان قارا لکه لری اورتادان قالدیرار.
هضم سیستمینه و وزن آزالتماغا یاردیمجی دیر
ائدیلن بیر چوخ بیلیمسل آراشدیرمالار، یوغوردون وزن آزالتماغا کومک اولدوغونو اورتایا قویموشدور، چونکو یوغوردون ایچینده کی کلسیم و امینواسیدلر، بنیه ده تاپیلان ایضافی یاغلاری یاندیریر. بونون یانیندا دا عضله لری گوجلندیریب بونونلا بیرلیکده یاغ سلول لارینین ایچینده کی لازیم سیز یاغلارین ائشیکه آتیلماسینا کومک ائدیر. یوغورت ضررلی باکتری لری تاثیرسیز حالا گتیریر. باغیرساق عفونتینه سبب اولان ضررلی باکتری لرین ائشیکه آتیلماسینا کومک ائدیر. گئنیش معنی دا هضم سیستمی ایچین فایدالی بیر مغذی ماده قایناقی دیر. یوغوردون هضم مرحله لرین راحات ائتدیینه گؤره، خصوصیله کیلو آزالتماق ایچین رژیم توتانلارین گئجه ساعاتلاریندا یوغورت یئمک لری توصیه اولور. یوغورت طبیعی بیر گؤبلک درمانی‌دیر. بئله کی، یوغورت، گؤبلک سبب‌لی میدانا گلن معده-باغیرساق خسته‌لیک‌لری‌نین آرا‌دان قالخماسینا سبب اولور. یوغوردون ترکیبی پروتئینله زنگین اولدوغونا گؤره، بدنده اولان آرتیق یاغلارین اریمه‌سینه یاردیم ائدیر. یوغورت اینسانی اوزون مدت توخ توتور، اونون شیرنیه اولان هو‌سینی و ایشتاهاسینی آزال‌دیر. یوغورت متابولیزمی سورعتلندیریر و ان چوخ قاریندا ییغیلمیش یاغلارین اریمه‌سینه سبب اولور.
P34-N-2

قلب، قان و اونون فیشاریندا اولان تأثیری
یوغورت بنیه نی قوتلندیریر. بیر پُرس یوغورت، اؤنملی بیر میقداردا پتاسیم، فسفر، ریبوفلوین، ید، روی و ویتامین لره شامیل دیر. قان سلوللارینی قوُرور و اونلاری گوجلندیرمه خصوصییتی واردیر. قان سلوللارین گوجلندیرمه سی، گئنیش معنی دا، ایمنلیک سیستیمی نین فایداسیندادیر. گوجلو ایمنلیک سیستیمی قیش آیلاریندا آنفلووانزا و باشقا سویوق دیمه دن قایناقلانان خسته لیکلارا یاخالانما ریسکینی آزالدیر. یوغورت عصب سیستیمینین دوزگون چالیشماسینا یاردیمجی اولان ویتامین « B12» ب اون ایکییه چوخ میقداردا صاحیب دیر. دوزنلی اولاراق( منظم حالدا) یوغوردون یئمه یی، بو ماده لرین یوخلوغوندان اورتایا چیخان مرضلرین قاباغین آلیر.
یوغورت قان فیشارینین یوکسلمه سینه چاره دیر. گونلوک اولاراق ایستیفاده ائتمه میز گرکن دوز میقدارینی آشدیغیمیز دوروموندا، هیپرتانسیون(فشارخون)، بؤرَک و قلب ناخوشلوقلارینا یاخالانماق احتیمالی یوکسلیر. یوکسک قان فیشاری بیر چوخ ناخوشلوقلارین آنا سببی دیر، خصوصیله قلب ساغلیغینی جیدی معنی دا تهدید ائدیر. بو اوزدن گونلوک بیر کاسا یوغورت یئمه یی قان فیشارینین قاباغینی آلار و وجودون ساغلیغینی قورور.
سویوق دیمه، دیش و لثه ایچین فایدالاری
یوغورت بدنی سویوق دیمه دن قورور. بو موضوعلا علاقه لی ائدیلن بیر چوخ بیلیمسل چالیشمالار، یوغوردون سویوق دیمه خسته لیکلریندن قوروماغینی اورتایا قویموشدور. گونلوک دوزنلی( روزانه منظم) اولاراق یئییلن بیر میقدار یوغورت سلوللارین میکربلارلا ساواشماسینی آسانلاشدیریر. یوغورت دیش ساغلیغی ایچین فایدالی دیر. تورکیه نین مارمارا یونیورسیته سینده ائدیلن بیر آراشدیرما نتیجه سینده، یوغوردون دیش مینالارینا فایدالی بیر ماده قایناغی اولدوغونو اورتایا قویموشدور. بونون یانیندا یوغوردون بوُل میقداردا لاکتیک اسید لره صاحیب اولدوغوندان دیش اتلرینی(لثه لری) قورومادا اساسی بیر رل اویناییر. گونلوک اولاراق بیر کاسه یوغورت یئمک دیش و دیشه باغلی ناخوشلوقلارا یاخالانماق ریسکینی آزالدیر.
گؤز یورقونلوغوندا
یوغوردون گؤز ساغلیغینا فایدالاری: خصوصیله حدیندن آرتیق یورقونلوقدان قایناقلانان گؤز آلتیندا شیشکینلیک و گؤیَرمه لر یوغوردون سایه سینده گئده ریله بیلیر. یوغوردو گؤزون آلتیندا گؤیرمیش یئره 15 دقیقه قالاجاق شکیلده یایماق نتیجه سینده بو قارالمالاری اورتادان قالدیرماق اولار.
دوکتور «ارکان توپوز» تورکیه لی سرطان متخصصی نین تووصیه سی:
«اوشاقلاریزا میوه و یوغورت بول بول یئدیردین. آنجاق یوغوردو پرِبیوتیک و ائو یوغوردو اولاراق ایستیفاده ائدین، یعنی یوغوردوزو ائوده دوزلدین. پنیر و یوغورت چوخ یئیین. گئچی پنیری چوخ فایدالی دیر.»

قملی فاجعه
P34-N-3

ایللر بویودوراؤلکه میزده طبیعت قهری و یا اینسان حئرصی! بؤیوک فلاکتلره سبب اولوب، بیر سئرا مظلوم، فداکار و گوناه سیز اینسانلارین یووالارین ییخیب، جانلارین آلیب و عائیله لرین آغلار بئراخیب. گئچن هفته تهران پلاسکو بیناسینداکی اوز وئرن تراژدی نتیجه سینده، تاسفله بیر چوخ جسور و شوجاعتلی اطفاجیلاریمیز حیاتینی غاییب ائتدیلر. چوخلو کسبه بیردن بیره یوخسول اولدولار. بو فلاکت و بو قملی فاجعه شوبهه سیز بوتون وطنداشلاریمیزی قم و ماتمه باتیردی. بو سبب دن اوره ییمیز دردینن دولو اولاراق، رحمتلیک چاغداش شاعیریمیز «عاصم اردبیلی»دن بیر تحفه بو شرفلی اطفاجیلاریمزین روحونا تقدیم ائدیریک و اونلارین عائیله لرینه باش ساغلیغی دئییب اؤزوموزو اونلارین قمینده شریک بیلیریک. آیریجا، اینسان جانی سؤز موضوعو اولان بئله بیر اؤلوملو قضالاردا، بیر پارا وطنداشلاریمیزا یالنیز اؤزونه فیکر ائتمه مه یی و سِلفی عکس گؤتورمک ایچین حادیثه نین یاردیمجیلارینا یولو باغلاماماق شعورونو، آنلاییشینی، ادب و دوشونجه سینی آلله دان آرزیلاییریق.

P34-N-4
گوجلو شاعیریمیز نئچه ایل بوندان اؤنجه، آذربایجان دا اوز وئرن زلزله فلاکتینده ساوالان داغ ایلا دانیشیب و «زلزله حادیثه سینده قانا باتان ائللریمه کیچیک بیر تحفه»دئیه، سؤیله میشدیر:
ساوالان قانا باتدی
فاجعه نین آغیرلیغی کلمه لره سیغیش مئییر
ندن یازیم، نئجه یازیم!
قاراقیشین قانلی اَلی دیرناخلارین ایلیشدیریب یاخامیزا
یاز گیزلنیب، قارانقوشلار یولدا آزیب، قارا یئللر وعده
یئلین خفه له رک، چارداق کی یوخ! اَلی قابار اِئللریمین
ائولرینی ییخماقدادیر، یئر کوره سی سانجی چکیر، قورخو
دوغور، ائل روزی سین اَکیب بیچیب، بیتیرنلر
نئجه دئییم؟! قویلانیپلار یئرین قارا تورپاغینا، دَن یئرینه
ساوالانیم! دامنینده بئجرتدیگین مرد ایگیدلر قانا باتیب
جاوان قوجا، اوشاق بؤیوک، مین بیر قارقیش توپوره رک
بو دونیانین قورقوسونا، یاشایشین داشین آتیب
آنا قالیب، بالاسی یوخ، بالا قالیب آنا سی یوخ، باجی
اوخشور قارداش بویون یانایانا، باغری اولوب شانا شانا
قارداش توتور باجیسینین سوراغینی آوار آلتدان
آتالارین قان تریلن دیکلدیگی داخمالاری، بالالارین
قبری اولوب، بئجرتدیگی گوللر سولوب
فاجعه نین آغیرلیغی کلمه لره سیغیش مئییر
ساوالانیم! بو ایل سنین اتکینده بیتن گوللر، ائللروون
آل قانیلان بزه نه جک، لاله لرون، گلینلرون یاناغیندان
قیزیل گولون، کؤرپه لرین دوداغیندان
قارچیچگین، آنالارین آغ ساچیندان
بولاخلارون، باخیشلارین قان یاشیندان
قرنفولون، جوانلارین گؤز قاشیندان پای آلارکن، بویاناجاق
ساوالانیم! بو ایل سنون قوناخلارون، قوجاق قوجاق
بوقچا بوقچا اینسانلارین عاطفه سین اته گینه تؤکه تؤکه
باش ساغلیغی وئرر سنه
یئنی قوشما، یئنی ماهنی «عاصم» کیمین دییر سنه